الانترنت ..... نعمه ام نقمه؟؟!!

[أشلاء قلب]

ليه الصداقة بقت سهله اوى كده
على الانترنت ... مع اننا فى حياتنا الفعليه بنحفى ونشقى علشان نلاقى صديق او اتنين مخلصين

لأن ببساطة البنات والولاد بيحكوا عالنت اللي هم عايزين يحكوه
وكمان منهم مؤلفين عبقريين جدا جدا ( يستاهلوا جايزة الكدب العالمية والمركز الاول كمان )
كل شاب او بنت - الا من رحم ربي طبعا - بيحكي حياته زي ما هو عايزها
وكمان بيطلع ساعات بطل من الابطال اللي يستاهلوا الشكر والتقدير - ولو دورت عالحقيقة - تلاقيه قاعد في سايبر حقير الساعة ب1 جنيه

ليه الصداقه بين الولد والبنت بقت سهله اوى اوى على الانترنت ..
مع اننا فى حياتنا الفعلية ده نادر اوى

1-لأن معليهاش رقابة
2-لأن كل ينت وولد بيبرروا لنفسهم ان دي مش حرام ومش عيب
3-لأن كل الاهالي تقريبا الا ناس قليلة اوي ملهمش علاقة وطيدة بالنت

ليه البنت ممكن تتقبل اى لفظ اعجاب مثل يا قمر .. يا عسل ..
ويتطور الامر لـ يا خطيبى ويا خطيبتى

لأنها بتعيش في الوهم وتتخيل ان ده فارس الاحلام اللي حياخدها على حصانه الأبيض ويطير بيها لسابع سما - وطبعا يرميها من فوق -
وبيتهيألها كمان انها كل ما تلبيله في طلباته - اللي طبعا لا دين ولا اخلاق ولا تربية حتى - يقبلوها كل ما يتمسك بيها اكتر

ومليون هل ..... - هل عشت قصة حب عنيفة على الانترنت ثم صدمت
مكتشفاً بعد ذلك بانها ليست اكثر من وهم افتراضي ؟

الحمد لله الذي عافانا من العفانة ( دي كلمة الشيخ محمد حسين يعقوب )
انا لا بس ليا اصحاب عاشوا عالوهم وفجأة اكتشفوا ان فارس الاحلام وبطل القصة راجل متجوز وفي رقبته عيلين او تلاتة كمان

- هل انت مدمن المواقع الاجتماعية مثل الفيس بوك و تويتر وغيرها من مواقع على اختلاف تسمياتها ؟؟

لا بالعكس انا شايفة ان الفيس بوك مثلا عرض عام لحياة الانسان
من علاقات ومعاملات وصور عائلية وشخصية
واقولكو على سر :- عملت حساب عليه وبعدين بصراحة احتقرت نفسي جدا اني عملت كده

- هل انتى زوجة جعلها الانترنت تنتظر بفارغ الصبر ذهاب زوجها للعمل كي تتفرغ لمواقع الشات ” المواقع الاجتماعية ”

اولا اللي تعمل كده ميطلقش عليها اصلا لقب زوجة
سواء كانت بتدخل شات او كانت سفيرة علاقات عالفيس بوك او ايا كانت

- هل انتى زوجه ستقولين ان زوجى يجلس بجانبى وانا على الانترنت ؟ ... اذن فما هى يا ترى نظرتك لزوجك ؟؟؟

الراجل اللي يعمل كده سوري يعني مش راجل اصلا
الا اذا كانت زوجته دي شغلها او دراستها عالنت
وفي الحالة دي طبعا مش حيقعد جنبها

هل انتى سعيده بعدم غيرته وبروده ؟؟

الراجل اللي ميغيرش على مراته اكيد مش بيحبها لانه لو بيحبها عمره ما حيقبل بده

أم انتى سعيده بتياسته وقرونه ؟؟

فعلا كنت عايزة اقول الكلمة دي بس مرضتش

وتبررين ذلك بالجمل الخالده لكل فتيات العصر الحديث -
انا واثقه فى نفسي وما دمت ما بعملش حاجه غلط يبقي خلاص

اللي بتعمل صح ومش بتعمل حاجة غلط مش حتستنى جوزها ينزل شغله علشان تقعد خمس او ست ساعات عالنت وتقوم في خمس دقايق تلم بيتها وشغل بيتها

اذن السؤال الأن : ماهو الغلط بالنسبه لكم ؟؟

الغلط :-
هو الصداقات المحرمة والعلاقات المشينة اللي بيكون اولها دعوة عالميل او حتى رسالة عالفيس بوك
ممكن نتعرف؟
كلنا اكيد جاتلنا الرسالة دي بس يا ترى مين عمل ايه معاها؟
ويا ترى اللي قبلها قبلها علشان ميحرجش الشخص وخلاص ولا قبلها وفي نيته احلام واوهام د يكون سمعها من اصحابه او زمايله

وتتشدقين بانك محافظة جداً ومتدينة جداً وعلاقتك بالانترنت
لاتعدو مكانا للتسلية وقتل الفراغ او تبادل الخبرات مع غيرك
مما هو مثلك حول شئون الاسرة وتربية الاطفال ؟

البنت مش عيب انها تكون محترمة وملتزمة وتدخل عالنت
بس المهم بتدخل تعمل ايه وتتكلم مع مين وفين وفي ايه؟ 100 سؤال لازم يتجاوبوا قبل ما نحكم عالولد او البنت بانهم ملتزمين او لا

- هل انت زوج يغافل زوجته ويترقب البقاء مع جهاز

الكومبيوتر لوحده ؟

برضه زي ما قلنا عالزوجة
الزوج اللي يعمل كده ميستحقش لقب زوج
عارفين ليه لان الزوج ده المفروض انه بيحمي الاسرة مش بييهدها
وانا اعرف بيوت كان سبب من اسباب انهيارها النت والعلاقات اللي عالنت

بس للحق على فكرة في ستات او زوجات هم اللي بيدوا للراجل فرصة انه يعمل كده باهمالها في نفسها وشكلها وشياكتها ودلعها

وتبرر هذا بان زوجتك اصبحت مهملة وان شعلة الحب التي
كانت قد انطفأت على حين غيرة وان الحياة الزوجية اصبحت رتيبة ومملة !!

لازم يشوف مراته طبعا كده لان البنات اللي بيعرفهم ويكلمهم او حتى اللي بيشوف صورهم مش حيحطوا صورهم وهم في المطبخ ولا بيمسحوا البيت ولا بينضفوه ولا واقفين على ترابيزات المكوة لما ضهرهم اتقطم

لكن يا عيني اللي في البيت دي هو مش بيفكر ان منغيرها لا حياكل اكل حلو ولا حيلبس لبس مكوي ولا شوزة متلمعة ولا اي حاجة من دي ولا حتى حيعيش في مكان نضيف

بس مع ده كله نصيحة للزوجات
:
نضافتك وشياكتك وجمالك في عين زوجك من اهم عوامل انه ميدخلش عالنت علشان علاقات ولا صحوبيات

- هل انتى فتاة تبحث عن عريس لها وتعتقد بان هذه اسرع
واسهل طريقة للحصول على عريس الغفلة ؟؟

البنات اللي عملت كده خدوا على دماغهم لان اول مشكلة بتحصل بينهم بيفتكرلها كل حاجة واول كلمة بتتقال انتي اللي كنتي بتدوري عالعرسان ده حتى دورتي عليهم عالنت

- هل انت شاب تعتقد بانك اصبحت دون ... جوان زمانك وانك
توقع بالفتيات الواحدة تلو الاخرى بدباديبك، واصبحت دونجوانا عابرا للقارات على الفيس بوك او تويتر ؟

مع اني مش شاب ( مذكر يعني ) الا اني شايفة ان كل حاجة بيعملها الشاب لازم تترد ليه في الدنيا قبل الآخرة سواء كانت في امه - اخته - بنته - اي انثى من عيلته الموقرة طبعا اللي منقدرش نقول عليها تلت التلاتة كام

- هل انت طالب او طالبة تلميذ او تلميذة اصبح شغلك الشاغل
هو البحث عن المراجع العلمية والدراسات السيكولوجية
والانثروبولوجية على الانترنت ؟
لكنك في الحقيقة تضيع وقتك من حيث لاتعلم باشياء ليست لها
علاقة من قريب او بعيد بالتعليم .

ناس كتير نظرا لجهل بعض الاباء والامهات بحياة النت
يقعدوا انهم بيذاكروا ولكن الحقيقة تقدر تقول ممكن شات - ممكن تفاريح مع اصحابهم وهئ و مئ وكده يعني

- هل مللت كل ذلك وشعرت بان حياتك الواقعية تبخرت وحلت
محلها حياة افتراضية وهمية ؟؟

نوع تاني بقى من اللي عالنت
عندهم شيزوفرينيا ( انقسام في الشخصية )
حياتهم الحقيقية مش عاجباهم ومش قابلينها
وليهم حياة سرية عايشينها في الاوهام وبس وفي الكدب اللي عالنت
بيحلموا انهم عايشين في قصور ... والاصل هي جحور
بيحلموا انهم بياكلوا سيمون فيميه ... والاصل لقمة يا بيه
بيحلموا انهم بيلبسوا مستورد ... وهم بيلبسوا مستعمل

- هل حاولت اكثر من مرة الاقلاع عن الدخول للانترنت ثم عدت
بعد فترة لتبدأ من جديد ؟؟

النت فعلا ادمان وفعلا عندك حق
ولازم حتى اللي بيدخلوا نت لشغل او دراسة يقننوا الدخول ويعالجوا نفسهم من الادمان ده لان للاسف النوع ده ملهوش مصحات ولا مستشفيات ولا ادوية تعالجه
لازم الارادة

وليتنا نفعل على الانترنت ما نفعله فى حياتنا الحقيقية

فعلا ياريت نعيش حياتنا زي ما هي منغير اقنعة ولا ماكياج ولا تجميل

صدقوني ان كل انسان على طبيعته احلى واحسن وافضل 100 مرة


اما اخيرا عارفة انك مش عايز ردود واجابات عالاسئلة بس انا بدات اكتب الرد محستش غير وانا ببعت كل ده
عذرا عالاطالة