كل ما كتب صلاح جاهين من رباعيات وأشعار (موضوع متجدد) - الصفحة 5 - منتديات كيو ون q8-one

karmen · #1 03-14-2010, 05:10 AM

يا وردة قلبي معاكي في الريح لعب
لا تعبتي م الريح و لا قلبي تعــــــــب
احنا كده : نرتاح في صخب الجنون
و في السكون بنخاف قوي و نترعب
عجبي !!!

karmen · #2 03-14-2010, 05:11 AM

لولا اختلاف الرأي يا محـــــترم
لولا الزلطتين ما لوقود انضرم
و لولا فرعين ليف سوا مخاليف
كان بيننا حبل الود كيف اتبرم ؟
عجبي !!!!

karmen · #3 03-14-2010, 05:12 AM

مركب ورق من نفخة تتطـــــــــوح
ركبتها و الكل بيــــــــــــــــلوح
سوحت فيها اتنين و خمسين سنــــه
للآن ..... و لا بتغرق و لا تـــــروح
عجبي!!

karmen · #4 03-14-2010, 05:12 AM

عالجسر فت الصبح تحت الضباب
بين اللي لسه بينغرس و اللي طاب
ما اهتز قلبي لنبت طالع جديـــــــد
قد اللي ماشي .. وتحت باطه كتاب
عجبي !!

karmen · #5 03-14-2010, 05:13 AM

يا خالق الكون بالحساب و الجبر
و خالقني ماشي بلختيار و الجبر
كل اللي حيلتي زمزمية أمـــــــل
وازاي تكفيني لباب القــــــــــــبر؟
عجبي !!

karmen · #6 03-14-2010, 05:14 AM

قاعدة قناني الخمر ساكتة و ساهية
مع ابن آدم في الشبه متناهيـــــــــــة
مفيش كده روقان في لحظة تشوفهم
و بعدها بلحظه يودوا في داهيــــــه
عجبي !!!

karmen · #7 03-14-2010, 05:14 AM

حتة محارة وجدتها في يوم لقيـة
قالت لي شوف كيف الطبيعة شقية
نظرت للكهف اللي فيها و لقيــــت
إن الطبيعة كمان لا أخلاقيــــــــــة
عجبي !!!!

karmen · #8 03-14-2010, 05:15 AM

بلياتشو قال إيه بس فايدة فنونــــي ؟
و تلات وقق مساحيق بيلونونـــــــي
و الطبل و المزامير و كتر الجعـــــــير
إذا كان جنون زبوني زاد عن جنوني
عجبي !!!

karmen · #9 03-14-2010, 05:15 AM

نقطة مرارة كمان علي مشروبـــــــــــي
دوبها يا ساقي حسب مطلوبـــــــــــــــي
طعب الحياة .. مش برضه فيها و فيها ؟
ليالي وردي و نهارات خروبــــــــــــي ؟
عجبي!!

karmen · #10 03-14-2010, 05:16 AM

عيد و العيال اتنططوا ع القبـــــــور
لعبوا استغمايه .. و لعبوا بابــــــور
و باللونات و نايلونات شفتشـــــــي
و الحزن ح يروح فين جنب السرور
عجبي !!

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
عناوين جرانين المستقبل (صلاح جاهين)	karmen	منتدي الفنون الادبيه	0	03-14-2010 06:22 AM
الضاحك الباكى ( صلاح جاهين )	صانع الخيال	منتدي الفنون الادبيه	2	02-07-2010 12:38 AM
من أشعار صلاح جاهين	karmen	منتدي الفنون الادبيه	8	10-27-2009 10:16 AM
رباعيات صلاح جاهين	karmen	منتدي الفنون الادبيه	4	08-13-2009 07:51 AM
مختارات من شعر صلاح جاهين	karmen	منتدي الفنون الادبيه	6	05-04-2009 11:42 PM