عدى عليـنا بكره يا سيّد ... @

[follow me]

السلامـ عليكمـ

بعتذر عن غيابى الفتره دى .. يارب تكونوا كلكمـ كويسين





موضوع جديد .. قضيه مهمه
لازمـ نركز فيـــها شويه



عدى عليـنا بكره يا سيّد

حد فيكم جرب يدخل مصلحه حكوميه لأى سبب ؟؟

اللى جرب و دخل احب اقوله قلبى معاك و ربنا يتولاك ع اللى حصلك
أما اللى ربنا كرمه و محصلوش الشرف .. لا يجيلى هنا عايز اقوله نصيحه لوجه الله و اهو كله بثوابه

العدد و الأدوات المطلوبه لدخول اى مصلحه حكوميه :

عدد 1 شريط برشام ضغط ( هيعلى عليك صدقنى )

عدد 1 شريط برشام مضاد حيوى ( عشان ينشط مفعول دواء الضغط .. لأنه بجد هيعلى )

عدد 1 امبول مهدىء للأعصاب ( لازم هتنفعل و تخرج عن شعورك .. ف الحقن اسرع وسيله )

عدد 1 شريط برشام للمغص ( عشان لو فكرت تشرب اى حاجه جوه على م الورق بتاعك يخلص )


بحمد الله تعالى تم الإنتهاء من ادوات الدخول العامه و المتاحه ...

نيجى لمرحله الورق المراد تخليصه و اللى هو السبب الرئيسى لوجودك فى المكان ده


بقدر الإمكان حاول يكون معاك :

1- 14 اصل و 22 صوره من كل ما يثبت و يفيد انك مواطن عايش فى البلد و زيهم او اكتر للسبب اللى انت رايح عشانه

2- نسختين من جميع الأختام اللى ممكن تحتاجها .. اصل يا عينى مهما كان ورقك كامل لازم هيرجعوك عشان اى ختم .. و كمان حتى لو الاختام كلها مظبوطه توقع انه يطلب منك ختم لحمه الجزار

3- شخص او اتنين و يحبذ يكونوا اجسام جامده عشان غالباّ هيغمى عليك هناك .. فتلاقى حد يشيلك


طبعاّ انتوا مش مستوعبين الكلام ده و فاكرنى ببالغ .. بس بجد اللى جرب هيعرف انى مش ببالغ






نيجى بقى للمنظر الــعام عند الدخول :

الهيـئه :-

حجرات متوسطه الحال او اقل و ده الأرجح _ مكاتب استعمال مدارس _ كراسى قابله للهلاك _ كام ريشه لازقين فى بعض و مكتوب فى العهده انها مروحه

الموظفين

الرجال :- يا إما مقضيها كلمات متقاطعه و سيجاره و شاى .. يا إما نايم شويه فى الجامع بعد صلاه الظهر اللى خلصت بقالها اكتر من ساعه
يا إما مركز فى مسابقه فى مجله عشان يدخل سحب على خلاط و مكواه

السيدات :- يا إما بتقطف ملوخيه يا إما بتفصص بسله او بتحفر كوسه يا إما راحت البيت تحضر الغدا و هتبقى ترجع تانى بس لو الساعه قربت من 2 و هى فى البيت خلاص مترجعش الشغل تانى

يا إما و ده الغالب جايبين فى سيره اى زميله غايبه فى اليوم ده

احداث واقعيه دايماّ تحصل من الموظفين اثناء تواجدهم بالعمل :

لو حاولت تعمل سوبر مان و تطلب مقابله المدير فى حاله ان الموظفين مش معبرينك .. انت كده بتطلب المستحيل

تلاقى الموظف بيبصلك كده بصه تحسسك انك لاشىء .. و انك جاى تعكر مزاجه .. قال يعنى هو بيعمل داى يوس فى الميريديان

حبيب قلبى بقى لو فضّى نفسه و قرر يسمعلك و اهو كله بثوابه .. و انت بتتكلم مره واحده تلاقى موبايله بيرن و يسيبك ولا كأنك موجود قدامه و يعييييش بقى فى المكالمه

لو سألت اى سؤال تلاقى اللى بيرد عليك بيحتقرك كده و يا يا عليك و على تقل دمك و انت بتسأل و هتتعبه بقى و يطلع الإجابه كانه بيطلع فلوس من جيبه
و على م يطلع الرد تكون طلعت روحك .. و ده عندهم اوّفر






شفتوا بقى المنظر الرائع ده ... مش عارف اقول ايه


ليــه :- * مفيش مواطن بيدخل مصلحه حكوميه الا و يطلع عين ( تيـــــــت )
* الموضوع مبيخلصش عند موظف واحد .. بس ليه و ليه ده لازم استاذ فلان يبعتك لأستاذ علان و تلف على يجى نص موظفين المصلحه و فى الاّخر ترجع بيتكم كأنك يا ابو زيد ما غزيت

و كل ده كوم و انك تكون فى مصلحه لأول مره ده كوم تانى

تفضل يا عينى تسأل و اللى يقولك الشمال الجاى تانى شباك و لما تروح الشمال ده يقولولك لا ايه اللى جابك هنا بس ... ده فى الدور التالت اول مكتب ع اليمين ,, و ربنا يكرمك و تطلع بقى تلاقى الصدمه الكبرى و هى ان الوصفه دى بتّودى ع المخزن او السطح و لما تلمح واحد تمسك فى رقبته و تسأله يبصلك و هو بيغمز كده و تحس ان عنيه فيها سوست و يقولك بص يا باشا
انت تنزل تحت فى الدور الأرضى عند استاذ فلان و هو هيخلص .. و قبل م تمشى تلاقى جيب بنطلونه اتفتح و بقى اوسع من لياقه قميصه .. و لسان جيبه بيقول ارمى اصتباحه يا باشا





المهم تنزل ع السلم و انت نفسك تلمح اى حد من الرعاع اللى لفّفوك و دوّخوك عشان تخلص فيهم همّك و تعبك
المهم تنزل و توصل للمكتب و تلاقى الفاجعه الكبرى .. الفّراش يقولك ده راح مشوار او اجازه النهارده و فى الأغلب بيكون بيصلى الظهر ( مع العلم ان الموظف بقاله اكتر من ساعه بره ) عادى جداّ .. .ربنا يتقبل





يا هناك يا سعدك يا حظك لو لقيته بقى .. ممكن تجيلك سكته قلبيه مؤقته .. الكامله هتجيلك لما ورقك يخلص .. ( ابقى قابلنى )
تدخل ع الموظف اللى المفروض هيخلصلك ورقك ( رحم الله الشرفاء و المحسنين و عم عبد القادر ... معرفوش بس بالمره و انا بدعى )
المهم ... تلاقى بعض الموظفين سايبين درج المكتب موارب كده .. ساعه م تشوف المنظر ده اعرف يا ضنايا انك لازم تدفع فلوس عشان المصلحه بتاعتك تتقضى و إلا تستنى الفرج لما حد يحن عليك ( و برضه مش كل الناس كده )




لحظه :-
- ليه كل ده بيحصل
- ليه مدخلش اى مصلحه و اخلص و رقى بسرعه و اروح بيتنا معزز مكرمـ
- ليه الناس بتعمل كده مع ان ده شغلها الأساسى اللى بياخدوا عليه مرتب من الحكومه


هختم كلامى بأحاديث نبويه عن الموضوع ده .. و ده بيبين اهميته

دى امثله و وقائع عن سيدنا محمــد عليه الصلاه و السلامـ

يقول النبي صلى الله عليه وسلم: “من نفّس عن مؤمن كربة من كرب الدنيا نفس الله عنه كربة من كرب يوم القيامة” رواه مسلم .



قال رسول الله صلى الله عليه وسلم ( أحب الناس إلى الله أنفعهم، وأحب الأعمال إلى الله عز وجل سرور تدخله على مسلم، أو تكشف عنه كربة أو تقضي عنه دينا، أو تطرد عنه جوعا، ولأن أمشي مع أخي المسلم في حاجة أحب إلى من أن أعتكف في المسجد شهرا، ومن كف غضبه ستر الله عورته، ومن كظم غيظا، ولو شاء أن يمضيه أمضاه، ملأ الله قلبه رضا يوم القيامة، ومن مشى مع أخيه المسلم في حاجته حتى يثبتها له، أثبت الله قدمه يوم تزل الأقدام. وان سوء الخلق ليفسد العمل كما يفسد الخل العسل ) صحيح الجامع 176



الحديث ده بقى هو اللى اعرفه لأنى قريته فى مصلحه حكوميه .. معلقينه كده و لا بيعملوا يبه


قال رسول الله صلى الله عليه وسلم ( رأيت قوما من أمتي على منابر من نور يمرون على الصراط كالبرق الخاطف نورهم تشخص منه الأبصار لاهم بالأنبياء ولاهم بالصديقين ولاهم بالشهداء. إنهم قوم تقضى على أيديهم حوائج الناس))

مـش منــــقــول