أحمد مكي الفنان المصري ونجم الراب
أبوه جزائري وأمه مصريه
لكنه يا جماعه بيعترف ان مصر هي بلده
وأنا ببحث عالنت لاقيتله الإعتراف ده والأغنيه الراب دي
وبيقول::
في الأول قبل ماتش مصر والجزاير في السودان
حاولت أكون محايد بين البلدين
رغم إن إنتمائي وحياتي وطفولتي وجنسيتي مصري
عشان قدام ربنا ميجيش يوم أبقى فيه مساهم ولو بواحد في الميه
في فتنه ما بين بلدين أخوات
لكن في الحقيقه بعد الإهانه والغدر اللي شافوه أهلي وبلدي
خصوصاً إن الجزائر مرديتش بأي إعتذار حتى الآن
أنا لا أحترم من لا يحترم بلدي
والأغنيه دي أقل حاجه ممكن أقدمها لمصر
بلدي
الأغنيه::
مهما دورت ولفيت
غيرك وطن مالاقيت
زكريات طفولتي فيكي وبالنسبالي إنتي البيت
إنتي الحب إنتي الطيبه فيكي إتربيت
إنتي جنسية أمي أغلى من حبيت
في الغربه بره ببقى تهت وإنتهيت
بندم وبسأل نفسي طب ليه أنا مشيت
لو كنت فيكي صبرت وكل جهدي حطيت
وفدتك باللي عندي ومن جوه قلبي إديت
وأغرس في ولادي حبك أكتر ما أنا حبيت
هتبقي أحلى جنه أأمن آمان بيه حسيت
مش ممكن أبداً مهما يكون هنرضى بغيرك إنتي بيت
هيقول حفيدي في يوم بقبر جدي مريت
عزة النفس الهويه حب بلادي شميت
مش ممكن أبداً أرضى بغيرك إنتي بيت
مهما دورت أنا ولفيت الدنيا شرق وغرب
مافي غيرك إنتي يا بلدي أبداً جوه القلب
لمّا بكون مسافر وأرجع ماسك طريق
بفتكر كل حاجه فيكي بتصوير بطئ
شارعي وأهل شارعي عاملين زي الفريق
محدش فيهم يقدر يفوت جاره في ضيق
بيكون له أكتر من أخ وأصدق من الصديق
جوا كل حاره فيكي سلو وأصول
لو في يوم إتنين إتخانقوا ده يقول وده يقول
تلقى دايماً فيه كبير بيترجعله في الحلول
بفتكر لمّا كنا عيال صغيرين في الشارع
بنبني جون من طوب بنهاجم وندافع
ونخلص الماتشات ونروح ونشرب م الجامع
وقبل الدنيا ما تليل للغيه أكون طالع
أطيَّر الحمام مع أصحابي ونتابع
ويحط الليل علينا وكله لبيته يكون راجع
أحلى جو في العالم طول الأربع فصول
ليلك له أحلى سحر بدعي دايماً إنه يطول
فيكي أقوى المواهب فيكي أذكى العقول
فيكي طاقة بشر جامدين بشكل مش معقول
خفة دم شعبك ده في مدينه أو في ريف
حول كل مشاكله لنكت دمها خفيف
من زحمة الشوارع لحد حجم الرغيف
حتى في عز الكوارث تعليق ظريف يضيف
جدعان طيبين وبقلب أبيض كبير
حتى المناسبه في مصر بردو ليها طعم غير
رمضان أو العيدين إن كان صغير أو كبير
تلقى الناس في الشوارع فرحانه وبتوزع خير
أحن قلوب ستات في الدنيا ورجاله بتغير
لو منتخبنا جاب جون الشارع كله بيطير
قوللي
طب أرضى إزاي أنا دلوقتي بوطن غير؟؟؟؟؟؟
مهما دورت أنا ولفيت الدنيا شرق وغرب
مافي غيرك إنتي يا بلدي أبداً جوه القلب
