يا مشرط الجراح أمانه عليك
و إنت فـ حشايا تبص من حواليك
فيه نقطه سوده في قلبي بدأت تبان
شيلها كمان..والفضل يرجع إليك
عجبي !!
::::::::::::::::::::
دي مذكرات وكتبتها من سنين
في نوته زرقا لون بحور الحنين
عترت فيها..رميتها في المُهملات
وقلت صحيح أما صحيح كلام مخبولين
عجبي !!
::::::::::::::::::
دخل الشتا وقفل البيبان ع البيوت
وجعل شُعاع الشمس خيط عنكبوت
وحاجات كتير بتموت في ليل الشــتا
لكن حاجات أكتر بترفض تموت
عجبي !!
::::::::::::::
سمعت نقطة ميه جوه المحيط
بتقول لنقطه ما تنزليش في الغويط
أخاف عليكي م الغرق..قُلت أنا
ده اللي يخاف م الوعد يبقى عبيط
عجبي !!
:::::::::::::::
بحر الحياه مليان بغرقى الحياه
صَرَخت خَش الموج في حلقي ملاه
قارب نجاه .. صرخت قالوا مفيش
غير بس هو الحب قارب نجاه
عجبي !!
:::::::::::::::
فارس وحيد جوه الدروع الحديد
رفرف عليه عصفور وقال له نشيد
منين ..منين..و لفين لفين يا جدع
قال من بعيد و لسه رايح بعيد
عجبي !!
:::::::::::::::
كان فيه قمر كأنه فرخ الحمام
على صغره دق شعاع شق الغمام
أنا كنت حاضر قلت له ينصرك
إش حال لما هتبقى بدر التمام
عجبي !!
:::::::::::::::
|