[أشلاء قلب]

من خلال الفترة اللى قضتها في المنتدى لاحظت حاجة انه
ساعات كتير تلاقي ناس حبت واتخانت
صدقت و اتكدب عليها ؛ ضحت واضحى بيها
قدمت كل حاجة ؛ واللى اقدمتله ده معطهاش اى حاجة وضحى بيها
كتير وكتير عادى بيحصل وهيحصل وهيحصل
اولا بما اني مش قديمة اوي معاكو مقدرش احكم على اعضاء المنتدى بس اللي اقدر احكم عليه هي الحياة لاننا كلنا عايشين فيها


أنما اللى مش عادى
انه ليه كل واحد حب واتخان يحكم ويقول مفيش حب خالص.. ؟
ليه كل واحداتخدع يقول خلاص مبقاش في انسان صادق .. ؟
ليه حد لما يكون ايمانه ضعيف نقول خلاص مبقاش في مؤمنين .. ؟
وكتير وكتير بنقول ونعيد في اقاويل
ده بس وقت الصدمة لما بيكون او بتكون لسه مغمضين عيونهم عن الحقيقة
لسه عايشين في الوهم والسراب اللي دخلوه برجليهم ومحدش اجبرهم عليه


بمجرد اننا يحصلنا موقف او حتى مواقف في حياتنا
بمجرد اننا ندخل تجربة ونفشل فيها
بسبب فرد بيه نحكم على العالم كله انه معدش ليه امان

ليه مش تقول فيه وفيه ..؟
انه زى ما في ناس قذرة في ناس جميلة ليه بنجمع ومش نخص
عارف يا فان في مثل بيقول السيئة تعم والحسنة تخص
تلاقي اللي بيحب او بتحب حد اذا اتكلموا عن الطرف التاني ... يااااااااااااااه يطلعوه سابع سما وطبعا مفيش زيه ويتغاضوا عن كل عيوبه حتى لو كانت واضحة وضوح الشمس ( في عز الضهر )

واول ما يتصدموا وياخدوا على ............ مش محتاجة توضيح تلاقيهم بيسردوا كل الحاجات الوحشة اللي هم هم كانوا رافضين يشوفوها في الاول ويطلع كل الناس غدارين ووحشين
( مراية الحب عامية ... لا ملهاش عيون اصلا )


ليه بنعامل جميع الناس اللى حوالينا بذنب ناس تانية...؟
ليه منفتحش قلبنا من تانى ..؟ ليه مننساش الوحش ونفتكر الحلو..؟
وفي العكس ناس بتتجرح وكل ما تفتكر اللي جرحوها بتقول ربنا يهديهم ويصلح ليهم احوالهم
بالرغم من ان الناس دي ولا في دماغهم وعايشين حياتهم بالطول والعرض


ليه مش نعرف انه في ناس زينا بالظبط اتغدر بيها واتخدعت واننا مش لوحدنا..؟
وان الناس دى محتاجلنا زى ما احنا محتاجنلهم
لان اذا كل انسان بص لمصيبة غيره حتهون عليه مصيبته وحيحس انها بسيطة وسهلة ( بالبلدي كده اللي يشوف بلوة غيره تهون عليه بلوته )


يعنى احنا اتظلمنا ودوقنا طعم الظلم والجرح نقوم نظلم كل الناس !!
للاسف الناس بتقول لازم يشربوا من نفس الكاس
طبعا ده مش صح ابدا


ليه منعرفش ان الطيبون للطيبات و الخبيثون للخبيثات..؟
ليه تجربتنا في الحياة دايما بتضعفنا وتقضي علينا ؛ مش تقوينا ..؟
ليه وليه والف ليه ؟؟؟؟
لاننا بنحكم على التجربة من وجهة نظرنا احنا مش من وجهة نظر العقل والصح والغلط
كل واحد بيشوف نفسه ملاك وهو اللي مظلوم وان الطرف التاني دراكولا ومصاص دماء وطبعا مفيش كده
اكيد اللي ظلم ليه سبب انه يظلم
واللي اتظلم ليه ذنب اتظلم بيه


اقولك على حاجة

مش يمكن ربنا دوقك المر قبل الحلو ؛ علشان تعرف قيمة الحلو وانه نادر
مش يمكن ربنا عمل فيك كدا مخصوص علشان تحافظ بعد كدا على اللى
هيجيلك واللى هتعرفه
اكيد كلامك ده صح جداااااااااااااااا
وكمان لازم يكون عند الانسان يقين ان ربنا مش بيعمل اي حاجة وحشة للانسان هو اللي بيعمل الوحش لنفسه
وكمان ان كل اللي ربنا بيعمله لينا في حياتنا اكيد هو الاحسن والافضل حتى لو احنا شايفينه انه تعذيب لينا في الدنيا لازم نبصله انه اختبار وابتلاء وان الصبر ليه احسن دوا


اخر كلامى مش علشان واحد تخسر ملايين وتنهى حياتك
واعرف دايما انه هو اللى خسرك وانه اكيد اللى هيقدرك موجود
بس لما انت تقدر قيمة نفسك الاول ....
الانسان لو قدر نفسه الناس حتقدره
ولو احترم نفسه الناس حتحترمه
وهكذا

ولا انت شايف ايه .....؟؟؟؟!
انا قلت كل اللي انا شايفاه من قريب ومن بعيد
وكالعادة رغاية المنتدى مش بتبطل كلام
والسلام ختام