|
وأنا في الضلام .. من غير شعاع يهتكه
أَقف مكاني بخوف ولا أتركه ولما بيجي النور وأشوف الدروب أحتار زيادة .. أيهم أَسلكه ؟ عجبي !! |
نظرت في الملكوت كتير وانشغلت
وبكل كلمةْ ( ليه ؟ ) و ( عشانيه ) سألت اسأَل سؤال .. الرد يرجع سؤال واخرج وحيرتي أشد مما دخلت عجبي !! |
غَدْر الزمان يا قلبي ما لهوش أمان
وحاييجي يوم تحتاج لحبَة إيمان قلبي ارتجف وسأَلني .. أَأَمِن بإيه ؟ أَأَمن بإيه محتار بقالي زمان عجبي !! |
كان فيه زمان سِحليَّة طول فَرْسَخين
كهفين عيونها وخَشْمَها بَرْبخين ماتت .. لكين الرعب لم عمره مات مع إنه فات بدل التاريخ تاريخين عجبي !! |
كل اللي في الخمّارة صابهم جنون
صبحوا الرجال يتبادلوا كاس المنون وبْدمّ ونبيت انكتب ع الجدار " يا ميت ندامة ع اللي قلبه حنون " عجبي !! |
يوم قلت آه .. سمعوني قالوا فَسَدْ
ده كان جدع قلبه حديد واتحسد رديت على اللايمين أنا وقلت .. آه لو تعرفوا معنى زئير الأسد عجبي !! |
قالوا الشقيق بيمُصّ دم الشقيق
والناس ما هيَّاش ناس بحق وحقيق قلبي رميته وجبت غيره حجر داب الحجر ... ورجعت قلبي رَقيق عجبي !! |
بين موت وموت .. بين النيران والنيران
ع الحبل ماشيين الشجاع والجبان عجبي عَلادي حياة .. ويا للعجب إزاي أَنا - يا تخين - بقيت بهلوان عجبي !! |
دخل الربيع يضحك لقاني حزين
نده الربيع على إسمي لم قلت مين حط الربيع أزهاره جنبي وراح وإيش تعمل الأزهار للميتين عجبي !! |
أنا قلبي كان شخشيخة أصبح جَرس
جلجلت به صحيوا الخدم والحرس أنا المهرج .. قمتو ليه خفتو ليه لا فْ إيدي سيف ولا تحت منى فرس عجبي !! |
| الساعة الآن 03:36 PM |
Powered by vBulletin® Copyright ©2000 - 2026, Jelsoft Enterprises Ltd. TranZ By
Almuhajir