|
الموج تلول تهبط وتطلع تلول
يا بحر خدني الشط صاحبك ملول و اللا بلاش الشط هعمل به إيه ده ريحته طحلب مهري وأم الخلول عجبي !!! |
ورد في ورق سلوفان يا حلوه أهديلك ؟
و اللا أنقله بالطين في الشتله وأجيلك الأولاني لو وحا بحناني عجبي على التاني بإيه يوحيلك؟ عجبي !! |
أنا قلبي كوكب وإنطلق في المدار حواليكي يا محبوبتي يا نور ونار يلف مهما يلف ما بيكتفيش وتمللي نُصه ليل ونصُه نهار عجبي !! |
الأرض شوك أيوه لكن هايش و الحُمره مش يعني الطريق حايش دي دمنا السيال..وبُشرة خير إن إنتي عايشه وإن كنت أنا عايش عجبي !!! |
إيه اللي خدته من مرور السنين يا قلبي إلا دمعتك والأنين بتئن وترجع وبتفرح وترجع تحن مع إن مش كل البشر فرحانين عجبي !!! |
أوقات أفوق ويحل عني غبايا وأشعر كأني فهمت كُل الخبايا و أفتح شفايفي عشان أقول الدُرر ما أقولش غير حبة غزل في الصبايا عجبي !!! |
عيني رأت مخلوق في غاية البشاعه أنا قلت له لمّا تأملته ساعه اللذه والموت علموك اللزج وأنا علموني الفلسفه والشجاعه عجبي!! |
غطس وقب الموج نهود بمبي من ألف جيل جميلات ما تعلم بي يا قلبي عيب دول أمهاتنا القدام أستغفر الله العظيم ربي عجبي !! |
علقت في المُسمار قناع مهزله
ومعاه قناع مأساه بحزنه إبتلا بصيت لقيتهم يشبهوا بعضهم وأهو ده العجب يا ولاد وإلا فلا عجبي !! |
ظهر المسيح الحي على سفح ربوه و نزل بهالة الضي وقعد في قهوه بصوا.تعالوا.قالوا خليه في حاله الناس في حالهم يا بني..مالهمش دعوه عجبي !!! |
| الساعة الآن 08:41 PM |
Powered by vBulletin® Copyright ©2000 - 2026, Jelsoft Enterprises Ltd. TranZ By
Almuhajir