|
و لو إنضنيت وفنيت وعُمري إنفرط مش عاوز ألجأ للحلول الوسط و كمان شَطَط وجنون مانيش عاوز يا مين يقول لي الصح فين والغلط عجبي !! |
عاد الربيع كأنه طعم الحُب و الحُب نار جوه العروق بتصُب أتمتع إزاي بيه وأنا متقطع من كُتر خوفي لا في الخطيئه يطُب ؟ عجبي !! |
إزاي شبابنا يقوم وياخد دوره من غير صراخ يئذيه و يجرح زوره يا هل ترى أحسن له يقعد ساكت أو ينترك ولو خرج عن طوره ؟ عجبي !!! |
أحسن ما فيها العشق والمعشقه وشويتين الضحك والتريقه شُفت الحياه.لفيت.لقيت الألذ تغييرها.وده يعني التعب والشقا عجبي !!! |
عجبي على العجب العجيب العُجاب لمّا الحقيقه تطُل بعد إحتجاب وتروح وتحلا وفجأه تصبح مفيش كمثل طراطيش بحر ياما خد وجاب عجبي !!! |
في اللهو ماشي يا بهلوان إش إِش يا فراشه منقوشه على كُل وش شقلبت عقلي وعقلي شقلبني وكنت بحسبني بقيت ما أندهش عجبي !! |
وقفت ساعة الصبح بغسل سناني قالت لي شايف قوتي و لمعاني ؟ إيش تطلب اليوم مني ضحكة أسد ؟ واللا إبتسامة إعلانات أمريكاني ؟ عجبي !! |
الحلو يم اليم صابح رايح
سارح في حُضن الميه سابح سايح الحلو داب في البحر,قُلت أدوقه وجدت لسه البحر برضك مالح عجبي !! |
يا كُل كلمه للعجب في قاموس إنسكلوبيديا لسان العرب أو لا لاروس تعالوا نجده.ده لسه في عصرنا الشمس والبحر العريض بالفلوس عجبي !! |
ما إنتاش بتلعب ليه يا روح بابا ؟
و لا عسكري ولا لص في عصابه ؟ إلعب أسد أو ديب رهيب أو غزال دي الدنيا في نهاية المطاف غابه عجبي !!! |
| الساعة الآن 04:10 PM. |
Powered by vBulletin® Version 3.8.12 by vBS
Copyright ©2000 - 2025, Jelsoft Enterprises Ltd.
TranZ By World 4Arab
www.q8-one.com